Utente:Uldomm
Ciao a tucc, hoo pensaa che forsi la pagina de presentazion che la gh'era prima la faseva on poo schivi e la faseva minga sbarluscià i oeugg come quei de tanti alter utent in sù quell sitt chì. Allora me son ditt: Osti, magara anca tì te podet fà mej!.
Però son minga bon de fà sù quei paginn meraviglios cont ona motta de effett speciai e i sfond coloraa e i babelbox con milla informazion e troiad vari. Inscì hoo deciduu de fà sù ona robba anmò pussee differenta: ona bella pagina de presentazion in d'on'altra lengua!
Certo, magara vialter sii dree a dì Oeuh, ma quest chì l'è minga ona lengua, l'è on dialett!. Ecco, sii dree a dì ona puttanada.
A bon cunt, mì me par che ona robba compagna de questa l'abbia mai fada nissun, chichinscì, donca la foo mì. E adess, per fàmm conoss on poo pussee, vist che sont on incapazz de l'informatiga, mettaroo chì de sotta on poo de FAQ (anca se dì che 'sti quistion sien Frequently Asked l'è on poo 'na licenza poetiga).
Quistion faa despess
Come te seet rivaa chichinscì?
La prima volta che son rivaa in sù la Nonci l'è staa el 2007. Al temp, compagn de tanti alter bagai, seri vegnuu on fanatigh di Chuck Norris Facts e navigavi in sù l'Internett a la ricerca de robb noeuv de legg sora el mè eroe. E l'è staa inscì che hoo trovaa 'sto sitt. E poeu semm come l'è che vann quei robb chì, te tacchet a legg ona pagina e in duu dì t'heet leggiuu tusscoss. L'è on poo 'me la droga: mì son minga on drogaa, e allora gh'hoo de trovà ona quai altra dependenza.
Te se seet iscritt subit?
Nò, per nient! Son staa a longh on lettor passiv che 'l passava el sò temp a legg e a rid come on ciolla. Poeu on dì hoo deciduu de taccà a fà ona quai contribuzion anonima (credi a la pagina Scout) e de lì el percors l'è staa facil. Se la memoria la me tradiss nò, son diventaa utent o in del 2008 o in del 2009.
Cosa l'è che 'l te pias de Nonciclopedia?
Me pias l'idea de fà on'enciclopedia satiriga, l'idea de toeu in gir tutti. Mì son semper staa vun che me piaseven nò i robb trist o seri: quand che seri pussee giovin avevi anca scritt trai alter ribb ona parodia del Signor di Anei e 'l palinsest de ona television assurda. Me pias giugà coi paroll, la commistion de lenguagg e de tipi de umorismi, per esempi quell surreal con quell pussee realistigh (che in fond l'è on poo la bas de la comicità di mè zonn). E tanti de quei coss chì j'hoo trovaa scià.
E cosa l'è che 'l te pias nò?
Anca se ovviament soo ben che nissun l'è perfett e che mì son minga vun di utent pussee attiv e bravi, pensi de avèggh el diritt de fà ona quai critiga.
Per Nonciclopedia i problema vegnen quand se ciappom tropp sul seri e la ven foeura tropp l'ideologia. Me piasaria fà on para de esempi:
- La musiga: el me par evident che tanti paginn a tema musigal sien staa scritt giò de personn che creden de savè cossè che l'è la Verità con la v granda. Hinn quei che in fond creden che 'l rock el sia el gener musigal miglior del mond e che la musiga commercial la faga tutta schivi e che donca i unigh a 'vèggh conservaa la purezza di bei temp andaa hinn quei che ghe vann adree al Metal o al Rock Progressiv e via inscì: tutt el rest l'è domà merda. Adess, vun el pò anca cred a quei robb chì, che per mì hinn giudizzi on poo limitaa, ma se la passion l'è troppa forta, se finiss che i paginn diventen spot a favor del metal o di noios cantant impegnaa compagn del De André. E quest se ved soratutt in di discussion di paginn. In 'sti cas l'ironia e la leggerezza hinn sparii. Mì me paren quei che i Elio e le Storie Tese hann tolt in gir in la canzon Suicidio a sorpresa.
Ovviament, l'è pacifigh che bona part di sciori di quai hoo parlaa adess disen de vess fan di Elii, perché sono bravissimi tecnicamente anca se negli ultimi annni sono un po' peggiorati.
- La religion: anca chì, vun l'è liber de cred o nò, l'è giust perchè l'Omm l'è liber de fà quell che voeur. Ma anca chì, col passà del temp, la ven foeura tutta l'ideologia anticlerical, che la fà perd bona part de l'ironia. Mì me da minga fastidi el fatt che se parla maa de la Gesa e del Signor, vist che tutt i accus e i stori che hoo leggiuu tocchen minga la mia Fede: me da fastidi el tono incazzaa e violent che 'l ven doperaa in tutt i paginn a tema cristian. E le podi dì con certezza che 'l sia domà on'azion ideologiga perchè quand che mì hoo scritt la pagina Anticattolicesimo hinn rivaa ona motta de polemigh per i posizion ch'evi espress. Allora: chì se dis che se toeu in gir tutt; chì se dis che i robb che se scriven hinn domà ironigh e despess fals; ma quand che metti on'osservazion in la pagina de discussion de Test:Sei il Papa? me vegnen daa a mì respost che fann pensà che ghe sien duu pes e dò misur. E quest l'è proppi brutt.
S'te penset de fà chichinscì?
Per quell che podi, provaroo a mett on poo del mè umorismo al servizzi de on'opera inscì degna de merito. Certo l'è pussee facil parlà che scriv, perchè a scriv te gh'heet de vess minga ripetitiv e semper original, e cercà de trovà robb che faghen rid tucc, minga domà tì e i tò trii amis. Ona quai volta me par de vessegh riessi, alter probabilment nò.
'Me l'è 'l tò rapport cont i alter utent?
Bah, gh'hoo de dì che mì ghe parli minga tant ai alter utent: soratutt perchè mì scrivi proppi pocch in sù la Nonci, inscì gh'hoo minga ona gran "vita social". Purtropp ona quai volta gh'è di incomprension: mì son bituaa a on'enciclopedia online ben pussee piscinina, indove semm semper in quatter gatt, indove i robb se sistemen quasi in "fameja"; Nonciclopedia l'è ben pussee vesina a la Wikipedia in Italian, cont ona motta de gent e on fracch de utent che varden e controllen tucc i error. Quella robba chì, per mì, l'è minga semper bona al 100%, perchè gh'è 'l ris'c che te incontret vun che l'è on poo ortodoss e fissaa cont ona quai regola, e i discussion vegnen pocch diplomatigh. L'è anca vera che Nonciclopedia la ris'cia che i vandol riven ben pussee che la mia wikipedietta, donca el pò vess comprensibil che ghe sia di gent che varden con sospett quei che ghe dann minga a trà fedei fedei a tutt i regol e i norm.
Perchè te scrivet inscì pocch?
El fatto l'è che fà rid, e le podarà dì ogni comigh on poo professional, l'è proppi complicaa: e se l'è difficil quand che te parlet, l'è anmò pussee dura quand te gh'heet de scriv. Mì credi de vess ona persona ironiga e cont on cert umorismo, però son minga inscì bon de tirà foeura tucc i dì on articol che te fa s'cioppà del rid. Inscì, gh'hoo de pensàggh sora on bell poo, prima de mettes a scriv giò 'n quaicoss e trovà on bon numer de idei che poden fà rid. Inoltra, e l'hoo giamò scritt pussee de sora, mì sont impegnaa in d'on alter progett wiki che 'l me ciappa ona motta de temp.